Antique Medical Center, Temporaryo nga Indi Magbaton kang Pasyente

Antique Medical Center, Temporaryo nga Indi Magbaton Admission kag Consultation | Bugasong Online


Photo: CTTO

Ang Antique Medical Center (AMC) sa San Angel, San Jose, Antique, ang temporaryo nga indi anay magbaton kang mga pasyente nga igaadmiter sa ospital.

Dya angut sa sangka hitabo nga may napatay nga sangka pasyente nga naghalin sa Belison tungod sa Severe Pneumonia. Ang pamilya ang wara nagsugid sa interview antes i-admit ang pasyente nga sangka myembro kang anda panimalay ang naghalin sa Manila nga kon sa diin raku ang mga kaso kang COVID-19 infections, dya nga impormasyon ang naman-an ron lang pagkatapos nga napatay ang nasambitan nga pasyente.

Ginbul-an kang sample ukon specimen ang napatay para dya ang ipadara sa laboratoryo kag igatestingan kon dya positibo gid man sa COVID-19 ukon indi.

Suno sa sulat ni Sr. Elvira Theodore Ibardolasa, SPC, Hospital Administrator kang AMC, ang temporaryo nga indi pagbaton kang pasyente kang nasambitan nga ospital ang angut sa kakulang kang anda healthcare team nga magtugro serbisyo sa katawhan. Suno sa mga nakasulat sa social media, dya tungud pira sa mga Medical personnel kang AMC ang ginkunsiderar nga PUM ukon Persons Under Monitoring tungud sa hitabo. Ginkabig man nga mga PUM ang mga miyembro ka pamilya kang napatay.

Ginapasarig ni Sr. Elvira nga magabalik ang operasyon kang Antique Medical Center kon ang anda healthcare team ang may ikasarang ron nga magtugro serbisyo sa mga pasyente.

28 Mar 2020